Iok-hān Hok-im/約翰福音簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
21:1 I-é-su Tùi Chhit-ê Bûn-tô͘ Hián-hiān
Chiahê tāichì í-āu, I-é-su tī Tî-bé-lī-a ê hái piⁿ, koh hián-hiān kakī hō͘ bûn-tô͘ khòaⁿ; I ê chhut-hiān kì tī ē-té:
21:2 Ū Sí-mòng Piat-tò͘, kiò-chò " Siang-seⁿ-á "ê Tho-má-suh, Ga-lí-la-iah séng ê Ka-ná lâng Nâ-than-nâ-el, Che-beh-tái ê nn̄g-ê kiáⁿ, iáu ū bûn-tô͘ nn̄g-ê lóng chò-hóe tī hia.
21:3 Sí-mòng Piat-tò͘ kā in kóng, " Góa beh khì lia̍h-hî. " In kā i kóng, " Goán mā beh kah lí khì. In chiū chhut-.khì, chiūⁿ chûn; hit mê lóng lia̍h bô hî.
21:4 Thiⁿ-phú-kng, I-é-su khiā tī hōaⁿ-téng, m̄ koh, bûn-tô͘ jīn bē chhut I sī I-é-su.
21:5 I-é-su kā in kóng, " Siàu-liân lâng, lín lia̍h ū hî bô? " In kóng, " Bô pòaⁿ-bóe.. "
21:6 I-é-su kā in kóng, " Kā bāng pha lo̍h-khì chûn ê chiàⁿ pêng, chiū ē pha tio̍h hî. " In pha bāng lo̍h-.khì, in-ūi pha tio̍h chin chē hî, hî-bāng soah thoa bē khí-.lâi.
21:7 I-é-su só͘ thiàⁿ hit-ê bûn-tô͘ kā Piat-tò͘ kóng, " I sī Chú. " Sí-mòng Piat-tò͘ chi̍t-ē thiaⁿ tio̍h sī Chú, in-ūi thǹgpaktheh, chiū kóaⁿ-kín moa gōa-saⁿ, thiàu lo̍h-khì chúi-.ni̍h.
21:8 Kî-tha ê bûn-tô͘, in-ūi lī hōaⁿ bô hn̄g, chha-put-to saⁿ-cha̍p tn̄g, chiū ēng sè chiah chûn-á lâi kā hî á móa-móa ê bāng thoa chiūⁿ-hōaⁿ.
21:9 In chi̍t ē chiūⁿ hōaⁿ, khòaⁿ tio̍h ū teh to̍h ê hóe-thòaⁿ hóe, téng-bīn ū hî, koh ū piáⁿ.
21:10 I-é-su kā in kóng, " Tú-chiah pha tio̍h ê hî, lia̍h kúi-bóe-á lâi. "
21:11 Sí-mòng Piat-tò͘ chiū peh khí-lih chûn téng, kā bāng thoa chiūⁿ-hōaⁿ, kui-bāng tōa-bóe hî móa-móa, chóng-kiōng chi̍t-pah gō͘-cha̍p-saⁿ bóe; hî sûi-jiân hiah chē, bāng mā bô phòa-li̍h.
21:12 I-é-su kā in kóng, " Lâi chia̍h chá-tǹg. " bûn-tô͘ bô lâng káⁿ kā I mn̄g, " Lí sī siáⁿ lâng? " In-ūi in chai I sī Chú.
21:13 I-é-su kiâⁿ óa-.lâi, the̍h piáⁿ pun hō͘ in, hî mā sī ánne pun hō͘ in.
21:14 I-é-su tùi sí-lâng tiong koh-oa̍h liáu-āu, chhut-hiān hō͘ I ê bûn-tô͘ khòaⁿ-.tio̍h, che sī tē-saⁿ pái.
21:15 I-é-su kah Piat-tò͘
In chia̍h chá-tǹg liáu-āu, I-é-su kā Sí-mòng Piat-tò͘ kóng, " Iô-há-neh ê kiáⁿ Sí-mòng, lí pí thiàⁿ chiahê ū khah thiàⁿ Góa bô? " Piat-tò͘ ìn kóng, " Chú ah, ū, Lí chai góa ū thiàⁿ Lí. " I-é-su kā i kóng, " Lí tio̍h iúⁿ-chhī Góa ê iûⁿ-á-kiáⁿ. "
21:16 I-é-su tē-jī pái mn̄g i kóng, " Iô-há-neh （ Chù, Mt 16:17 kì chò Iô-ná ）ê kiáⁿ Sí-mòng, lí ū pí chiahê khah thiàⁿ góa bô? " Piat-tò͘ ìn kóng, " Chú ah, ū, Lí chai góa ū thiàⁿ Lí. " I-é-su kā i kóng, " Lí tio̍h chiàu-kò͘ góa hiahê iûⁿ. "
21:17 I-é-su tē-saⁿ pái kā i mn̄g, " Iô-há-neh ê kiáⁿ Sí-mòng, lí ū pí chiahê khah thiàⁿ góa bô? " Piat-tò͘ in-ūi I-é-su tē-saⁿ pái ánne mn̄g, chiū chin iu-būn, kā I-é-su kóng, " Chú ah, Lí ta̍k hāng lóng chai, Lí chai góa ū thiàⁿ Lí. " I-é-su kā i kóng, " Lí tio̍h iúⁿ-chhī góa hiahê iûⁿ.
21:18 Góa si̍t-chāi kā lí kóng, lí siàu-liân ê sî kakī pa̍k khò͘-tòa, sûi-piān khì lí ài khì ê só͘-chāi; to̍k-to̍k kàu nî lāu ê sî, lí tio̍h chhun chhiú hō͘ lâng kā lí pa̍k, kā lí thoa kàu lí bô ài khì ê só͘-chāi. "
21:19 I-é-su kóng chiahê ōe, sī teh chí Piat-tò͘ ē án-chóaⁿ sí lâi êng-kng Siōng-tè. Án-ne kóng soah, I-é-su kā i kóng, " Lâi tòe góa. "
21:20 I-é-su kah I Só͘ Thiàⁿ ê Bûn-tô͘
Piat-tò͘ oa̍t tńg-sin, khòaⁿ tio̍h I-é-su só͘ thiàⁿ ê bûn-tô͘ tòe tī in ê āu-piah. I to̍h-sī chêng tī boán-chhan ê sî, khò óa I-é-su ê heng-khám kóng, " Chú ah, sī siáⁿ lâng beh chhut-bē Lí? "ê hit-ê bûn-tô͘.
21:21 Piat-tò͘ khòaⁿ-.tio̍h, chiū mn̄g I-é-su kóng, " Chú ah, chit-ê lâng ē án-chóaⁿ? "
21:22 I-é-su kā i kóng, " Góa nā ài i oa̍h kàu góa koh lâi kah lí ū siáⁿ-mi̍h koan-hē? Lí tio̍h lâi tòe góa. "
21:23 Chit-kù ōe chiū ánne tī bûn-tô͘ ê tiong-kan liû-thoân, kóng, " Chit-ê bûn-tô͘ bē sí. " kî-si̍t I-é-su m̄-sī kóng i bē sí, sī teh kóng, " Góa nā ài i oa̍h kàu góa koh lâi kah lí ū siáⁿ-mi̍h koan-hē? "
21:24 Chit-ê bûn-tô͘ to̍h-sī ūi tio̍h chiahê tāichì chò kiàn-chèng, koh kā chiahê tāichì siá lo̍h-.lâi ê lâng, lán chai i ê kiàn-chèng sī chin-si̍t.
21:25 I-é-su koh ū chò chin chē hāng tāichì, nā beh kā chiahê tāichì chi̍t hāng chi̍t hāng siá lo̍h-.lâi, góa siūⁿ choân sè-kan mā bô só͘-chāi thang té hiahê kì-lio̍k ê chheh.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。