Sù-tô͘ Hēng-toān/使徒行傳簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
11:1 Ê-lú-sa-lèm ê Kàu-hōe Tùi Piat-tò͘ ê Chit-gî
Sù-tô͘ kah tòa tī Iô-tá-iah ê sìn-tô͘ lóng ū thiaⁿ tio̍h gōa-pang lâng mā chiap-siū Siōng-tè ê tō-lí.
11:2 Kàu Piat-tò͘ chiūⁿ Ê-lú-sa-lèm ê sî, hiahê siū-kat-lé ê iô-tá-iah lâng kā i phoe-phêng, kóng,
11:3 " Lí bat ji̍p-khì bô siū kat-lé ê lâng ê chhù kah in chò-hóe chia̍h pn̄g. "
11:4 Piat-tò͘ kā só͘ hoat-seng ê tāichì chi̍t hāng chi̍t hāng tùi in soat-bêng, kóng,
11:5 " Góa tī Io̍p-pe siâⁿ kî-tó kah sit-sîn ê sî, ū khòaⁿ tio̍h ī-siōng. Ū chi̍t-ê chhin-chhiūⁿ sì-kak-thâu pa̍k-.leh ê tōa-pak pò͘ tūi lo̍h-.lâi, lak tī góa ê kha chêng.
11:6 Góa siông-sè khòaⁿ, khòaⁿ tio̍h lāi-bīn ū tē-chiūⁿ ê chengseⁿ, iá-siù, thâng-thōa kah khong-tiong ê poe-chiáu.
11:7 Koh thiaⁿ tio̍h ū siaⁿ kā góa kóng, ' Piat-tò͘, khí-.lâi, thâi lâi chia̍h. '
11:8 Góa kóng, ' Chú ah, chhian-bān m̄ thang; in-ūi góa m̄ bat chia̍h lahsap bô chheng-khì ê mi̍h. '
11:9 M̄ koh, hit-ê siaⁿ tē-jī pái tùi thiⁿ ìn kóng, ' Siōng-tè só͘ hō͘ i chheng-khì ê, lí m̄ thang lia̍h-chò lahsap. '
11:10 Chit-ê tāichì liân-sòa saⁿ pái liáu-āu, hiahê mi̍h chiū koh siu tò tńg-khì thiⁿ-téng.
11:11 Tú hit sî, tùi Kai-sa-lī-a chhe-phài lâi chhōe góa ê hit saⁿ-ê lâng, lâi-kàu goán tòa ê hit keng chhù.
11:12 Sèng Sîn kā góa kóng, tio̍h kah in khì, tùi lâng m̄ thang ū chha-pia̍t khòaⁿ-thāi. Koh ū la̍k-ê sìn-tô͘ kah góa-.khì, goán lóng ji̍p-khì Kol-né-lioh ê chhù.
11:13 Kol-né-lioh kā goán kóng i ū khòaⁿ tio̍h chi̍t-ê thiⁿ-sài khiā tī i ê chhù-.ni̍h, tùi i kóng, ' Tio̍h chhe lâng khì Io̍p-pe, chhiáⁿ hit-ê kiò-chò Piat-tò͘ ê Sí-mòng lâi,
11:14 I ū ōe beh kā lí kóng, thang hō͘ lí kah lí choân ke lóng tit tio̍h kiù. '
11:15 Góa tú teh kóng ê sî, Sèng Sîn kàng-lîm tī in, chhin-chhiūⁿ tong-chho͘ kàng-lîm tī lán sin chiūⁿ kāng-khoán.
11:16 Góa chiū siūⁿ-khí Chú só͘ kóng ê ōe, ' Iô-há-neh ēng chúi kā lín sé-lé, m̄ koh lín ē niá-siū Sèng Sîn ê sé-lé. '
11:17 Kì-jiân Siōng-tè ū kā lán sìn Chú só͘ niá-siū kāng-khoán ê un-sù sù hō͘ in, góa sī siáⁿ lâng, ná ē-tàng chó͘-tòng Siōng-tè ê chok-ûi? "
11:18 Hiahê lâng thiaⁿ tio̍h chiahê ōe, chiū tiām lo̍h-.khì, kui êng-kng hō͘ Siōng-tè, kóng, " Án-ne kóng-khí-.lâi, Siōng-tè mā ū hō͘ gōa-pang lâng hóe-kái, lâi tit tio̍h oa̍h-miā. "
11:19 An-ti-o-khè ê Kàu-hōe
Ūi tio̍h Su-tê-hoa-no͘h ê tāichì siū pek-hāi sì-sòaⁿ ê sìn-tô͘, ū ê khì-kàu Hoe-ní-ke, Ku-pu-liò (chù, hiān-kim ê Sai-phú-lú-suh )kah Ai-ti-o-khè. In bô tùi pa̍t lâng káng tō-lí, chí ū tùi Iô-tá-iah lâng kóng niā-niā.
11:20 M̄ koh, kî-tiong ū chi̍t-kóa Ku-pu-liò kah Kó͘-lī-nāi ê sìn-tô͘ lâi-kàu Ai-ti-o-khè, in mā tùi Hi-la̍h lâng thoân Chú I-é-su ê hok-im.
11:21 Chú kah in tông-chāi, ke-thiⁿ in ê khùi-la̍t, chin chē lâng sìn lâi kui Chú.
11:22 Chit-ê siau-sit thoân kàu Ê-lú-sa-lèm ê kàu-hōe, in chiū chhe-phài Ba-ná-ba khì Ai-ti-o-khè.
11:23 Ba-ná-ba chi̍t-ē kàu-ūi, khòaⁿ tio̍h Siōng-tè ê un-tián chiū hoaⁿ-hí, i kó͘-lē tāi-ke, tio̍h choân-sim sìn-khò Chú.
11:24 In-ūi Ba-ná-ba sī hó lâng, koh ū Sèng Sîn chhiong-móa, só͘-í, ke-thiⁿ chin chē lâng lâi sìn Chú.
11:25 Āu-lâi, Ba-ná-ba khì Tà-soh chhōe Sàu-lô.
11:26 Chhōe tio̍h liáu-āu, chiū chhōa i kàu Ai-ti-o-khè. Chiok-chiok chi̍t nî, in kah kàu-hōe ê hōe-iú chū-hōe, kà-sī chin chē lâng. Bûn-tô͘ hō͘ lâng kiò-chò " Ki-tok-tô͘ ", sī tùi An-ti-o-khè khai-sí.
11:27 Hit sî, ū kúi-nā-ê sian-ti, tùi Ê-lú-sa-lèm lo̍h-khì Ai-ti-o-khè.
11:28 Kî-tiong chi̍t-ê miâ kiò-chò A-ga-bó͘ ê lâng khiā khí-.lâi, khò Sèng Sîn lâi ī-giân kóng, phó͘-thiⁿ-ē teh beh ū tōa ki-hng. Tng Ku-láu-tio thóng-tī ê nî-kan, kó-jiân hoat-seng chit-ê tāichì.
11:29 Bûn-tô͘ chiū koat-tēng, ta̍k lâng chiàu kakī ê le̍k-liōng hōng-hiàn, thang lâi chín-chè tòa tī Iô-tá-iah ê sìn-tô͘.
11:30 In chiū chiàu ánne chò, keng-iû Ba-ná-ba kah Sàu-lô ê chhiú, kià khì hō͘ hia ê tiúⁿ-ló.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。