Ka-lia̍p-thài su/加拉太書簡介 線上收聽:中文和合本 台語聖經 台語聖經(長老會傳播中心授權） 客語聖經 福州話聖經 粵語和合本 希臘文 下載檔案 關於語音聖經
5:1 Ki-tok-tô͘ ê Chū-iû
Ūi tio̍h beh hō͘ lán chū-iû, Ki-tok í-keng kā lán tháu-pàng, só͘-í, lín tio̍h khiā ho͘ chāi, m̄ thang koh hō͘ lâng ap-chè chò lô͘-lē.
5:2 Siū Kat-lé ê Cheng-lūn
Góa Páu-lô kā lín kóng, lín tio̍h chù-ì thiaⁿ, lín nā beh siū kat-lé, Ki-tok tùi lín chiū lóng bô lī-ek.
5:3 Góa koh-chài kiông-tiāu chi̍t pái, ta̍k-ê siū kat-lé ê lâng lóng tio̍h chun-siú lu̍t-hoat, ná chhin-chhiūⁿ khiàm-chè tio̍h hêng.
5:4 Lín chiahê siūⁿ beh khò lu̍t-hoat lâi kah Siōng-tè kiàn-li̍p hô-hó koan-hē ê lâng, to̍h-sī kah Ki-tok toān-choa̍t koan-hē, sit-lo̍h Siōng-tè ê un-tián.
5:5 In-ūi lán óa-khò Sèng Sîn, tùi Sèng Sîn teh thèng-hāu lán só͘ ǹg-bāng ê, to̍h-sī kah Siōng-tè ū hô-hó ê koan-hē.
5:6 In-ūi lán nā kah Ki-tok I-é-su kiat-liân, ū siū kat-lé á-.sī bô siū kat-lé lóng bô iàu-kín, iàu-kín ê sī tùi thiàⁿ-sim piáu-hiān chhut-.lâi ê sìn-sim.
5:7 Lín í-chêng chò liáu chin hó. Sī siáⁿ lâng kā lín chó͘-tòng, hō͘ lín bô koh sūn-chiông chin-lí?
5:8 Hitê soeh-ho̍k lín ánne chò ê, tong-jiân m̄-sī hit ūi ho͘-tiàu lín ê Siōng-tè.
5:9 Sio̍k-gí kóng, " Tām-po̍h-á ê kàⁿ ē hō͘ kui-sn̂g hoat khí-.lâi. "
5:10 Tī Chú ê lāi-bīn, góa chhim-sìn lín kah góa ê siūⁿ-hoat bē ū bô kāng. Hiahê teh kiáu-jiáu lín ê, bô-lūn sī siáⁿ-mi̍h lâng lóng ē siū Siōng-tè chek-hoa̍t.
5:11 Hiaⁿ-tī chí-mōe, góa nā iáu koh teh thoân kat-lé, ná ē iáu koh teh siū pek-hāi? Góa nā ánne chò, soan-iông Ki-tok ê si̍p-jī-kè chiū bē siū tio̍h chó͘-gāi.
5:12 Hiahê teh kā lín jiáu-loān ê lâng, góa khó͘ in m̄ kakī iam khí-.lâi.
5:13 Hiaⁿ-tī chí-mōe, Siōng-tè ho͘-tiàu lín, sī beh hō͘ lín tit tio̍h chū-iû, to̍k-to̍k m̄ thang hō͘ lín ê chū-iû piàn-chò hòng-chhiòng jio̍k-thé su-io̍k ê ki-hōe, tio̍h ēng thiàⁿ-sim lâi hō͘-siong ho̍k-sāi.
5:14 In-ūi choân-pō͘ lu̍t-hoat lóng pau-hâm tī" Thiàⁿ chhù-piⁿ chhin-chhiūⁿ kakī "chit tiâu kài-bēng lāi-bīn.
5:15 Lín tio̍h kín-sīn, lín nā kah khîm-siù kāng-khoán sio-kā sio-thun, kàu bóe it-tēng ē hō͘-siong châu-bia̍t.
5:16 Nn̄g Chióng Bô Kāng ê Seng-oa̍h Hong-sek
Góa ê ì-sù sī, Lín tio̍h chiàu Sèng Sîn ê ín-chhōa lâi seng-oa̍h, choa̍t-tùi m̄ thang kiû boán-chiok kakī jio̍k-thé ê su-io̍k.
5:17 In-ūi jio̍k-thé ê su-io̍k kah Sèng Sîn hō͘-siong tùi-khòng, pí-chhú sī tùi-te̍k, hō͘ lín bē tàng chiàu kakī só͘ ì-ài ê khì chò.
5:18 Lín nā hō͘ Sèng Sîn ín-chhōa, chiū bián siū lu̍t-hoat ê khòng-chè.
5:19 Lâng jio̍k-thé ê phín-hēng chin bêng-hián, to̍h-sī îm-loān, ù-òe, hò͘ⁿ-sek,
5:20 Pài ngó͘-siōng, kiâⁿ siâ-su̍t, kiat oan-siû, sio-cheⁿ, oàn-hūn, siū-khì, kiat-tóng, hun-phài, chū-su,
5:21 Oàn-tò͘, chiú-chùi, hòng-tōng, í-ki̍p kî-tha lūi-sū ê pháiⁿ phín-hēng. Góa í-chêng bat kā lín kéng-kò kòe, taⁿ koh chi̍t pái kā lín kéng-kò, tiāⁿtiāⁿ chò chit khoán tāichì ê lâng bē tàng sêng-chiap Siōng-tè kok-tō͘.
5:22 Sèng Sîn só͘ kiat ê kóe-chí-sī, thiàⁿ-sim, hoaⁿ-hí, hô-pêng, jím-nāi, chû-pi, siān-liông, tiong-si̍t,
5:23 Un-jiû kah chún-chat. Chiahê hêng-ûi it-poaⁿ ê lu̍t-hoat lóng bô teh kìm-chí.
5:24 Hiahê sio̍k Ki-tok I-é-su ê lâng, í-keng kā jio̍k-thé kah i ê chêng-io̍k chò-hóe tèng tī si̍p-jī-kè.
5:25 Kì-jiân lán khò Sèng Sîn teh oa̍h, lán tio̍h chiàu Sèng Sîn ê ín-chhōa lâi seng-oa̍h.
5:26 Lán m̄ thang tui-kiû hu-êng, m̄ thang hō͘-siong kek-khì, mā m̄ thang hō͘-siong oàn-tò͘.
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。